Presidenti i Turqisë, Recep Tayyip Erdogan, është bashkuar me zërat ndërkombëtarë që përshëndesin përpjekjet e fundit për paqe në Lindjen e Mesme, duke e cilësuar shtytjen për zbatimin e planit të paqes të Donald Trumpit si “një pikë kthese të mundshme”.

Në një deklaratë të cituar nga SkyNews, Erdogan vlerësoi vendimin e Hamasit për të liruar të gjithë pengjet e mbetura izraelite, duke thënë se ky veprim tregon “se është gati për paqe”.

“Kështu, është hapur një dritare mundësie për paqe të qëndrueshme në rajonin tonë,” theksoi presidenti turk.

Ai u bëri thirrje të gjitha palëve që të veprojnë me maturi dhe ndjenjë përgjegjësie, ndërsa i kërkoi Izraelit që të ndalojë bombardimet në Rripin e Gazës.

“Izraeli tani duhet të ndalojë bombardimin e Rripit të Gazës dhe u bëj thirrje të gjitha palëve të veprojnë me ndjenjë përgjegjësie”, u shpreh Erdogan.